A pasada fin de semana, o Club Sincro Ferrol participou no Campionato Galego de Inverno, celebrado na cidade de Ourense, cunha actuación moi destacada en todas as categorías nas que tomou parte, confirmando o bo momento deportivo que atravesa a entidade ferrolá.
A competición comezou o venres pola tarde coa proba de figuras alevín, na que Silvia Dobarro se proclamou terceira clasificada galega, acadando unha merecida medalla de bronce tras unha execución brillante. Pola súa banda, Noa Pico conseguiu unha novena posición moi meritoria, situándose entre as mellores nadadoras da categoría.
Na sesión de figuras infantil, Marta Leiras protagonizou unha importante remontada ao subir 34 postos na clasificación, rematando ademais quinta entre as nacidas no ano 2013, dentro dun grupo de grande nivel competitivo. Blanca Leiras foi 40ª, mentres que Julia Varela rematou no posto 41, completando así unha participación sólida do equipo infantil.
A xornada do sábado pola mañá estivo dedicada aos dúos. En categoría alevín, o dúo formado por Noa e Silvia quedou ás portas do podio tras acadar unha excelente cuarta posición. En categoría infantil, Marta e Blanca finalizaron oitavas, nunha actuación moi traballada na que amosaron unha gran compenetración e evolución.
Xa pola tarde, Julia competiu no solo infantil cunha actuación segura e expresiva que lle valeu unha magnífica quinta posición, consolidándose entre as mellores solistas do campionato.
O domingo pola mañá foi a quenda do solo alevín, no que Noa volveu asinar unha actuación de gran nivel, rematando cuarta a só dous puntos do podio, confirmando a súa progresión nunha categoría moi esixente.
A competición pechouse o domingo pola tarde co combo infantil, a rutina de equipo integrada por Julia, Blanca, Marta, Noa, Silvia, Sara e Nemesis, que rematou na sétima posición. O equipo sorprendeu desde o primeiro momento co impactante inicio da súa rutina de inspiración robótica, que provocou unha reacción inmediata nas bancadas e puxo de manifesto o traballo creativo e técnico desenvolvido ao longo da tempada.
En conxunto, o Club Sincro Ferrol regresa de Ourense cun balance moi positivo, tanto polos resultados acadados como polas sensacións deixadas, tras competir ao máis alto nivel en todas as modalidades. O compromiso, a constancia e a ilusión das nadadoras seguen a ser o motor dun proxecto deportivo que continúa medrando e gañando presenza na natación artística galega.
